Kreppan aftur skollin á í Danmörku

Landsframleiðsla Danmerkur minnkaði um hálft prósentustig á fyrsta ársfjórðungi ársins. Á fjórða ársfjórðungi síðasta árs dróst landsframleiðslan einnig saman í Danmörku þannig að kreppan er opinberlega aftur skollin á Dani.

Samkvæmt fréttum í dönskum fjölmiðlum er það einkum samdráttur í einkaneyslu þjóðarinnar sem gerir þetta að verkum. Einkaneyslan dróst saman um 1,9% á fyrsta ársfjórðungi ársins.

Samanborið við fyrsta ársfjórðung í fyrra jókst landsframleiðslan um 1,1% en það olli líka miklum vonbrigðum meðal Dana sem áttu von á vexti upp á 2,4% milli ára.