Síðasta holl með 234 laxa í Langá

Holl sem var að ljúka veiðum í Langá landaði 234 löxum á 4 dögum.  Þetta var fyrsta holl í maðki eins og oft er kallað, og greinilegt að það hefur verið veisla á bökkum Langár.  Laxinn er vel dreifður um ánna og voru menn að taka laxa alveg frá Strengjum á neðsta svæðinu og upp í Ármót sem er efsti staður.

Á þessum tíma, sé áin í sæmilegu vatni, eru öll svæði inni og oft alveg ótrúlega mikið af laxi sem safnast í suma hyljina.  Mikið af fiski er í ánni en hún er aðeins farin að sjatna í þurrkunum upp á síðkastið.  Það er þó rigning í kortunum svo að það eru frábærir dagar framundan í ánni.

Veiðin í Langá í fyrra var 2235 laxar og það er auðséð miðað við laxamagnið í ánni að áin á eftir að fara yfir þá tölu því það er ennþá tæpur mánuður eftir af veiðitímanum og það er ennþá að veiðast lúsugur lax í ánni.

Þess má geta að það er aðeins ein stöng laus í vefsölunni hjá SVFR núna í lok ágúst svo er áin uppseld til 20. september.