Eigendur danskra banka tapa 3.000 milljörðum

Gengistap hluthafa í fimm stærstu bönkum Danmerkur frá áramótum nemur um 140 milljörðum danskra kr. eða ríflega 3.000 milljörðum kr.

Fjallað er um málið í Berlingske Tidende. Þar segir að frá því að kauphöllin í Kaupmannahöfn var opnuð að morgni 3. janúar s.l. og þar til viðskiptum lauk síðdegis í gærdag hafa hluthafar í Danske Bank, Nordea, Jyske bank, Sydbank og Spar Nord Bank tapað 139,8 milljörðum danskra kr.

Gengistapið er mest hjá hluthöfum Nordea en þeir hafa tapað 68,2 milljörðum danskra kr. frá áramótum þar sem gengi hluta í bankanum hefur fallið um ríflega 27% á þessu tímabili.

Hluthafar í Danske Bank hafa tapað tæpum 60 milljörðum danskra kr. þar sem hlutir í bankanum hafa fallið um 22% frá áramótum. Af þessari upphæð hjá eigendum Danske Bank fuku 19 milljarðar danskra kr. út um gluggann bara í síðustu viku.

Ástæðan fyrir þessum miklu lækkunum á hlutum í dönskum bönkum er í samræmi við þróunina hjá flestum öðrum bönkum í Evrópu, það er skuldakreppan í suðurhluta álfunnar og skuldavandamál Bandaríkjanna. Þar hefur svo bæst við óvissa í kringum frekari aðstoð danska ríkisins við bankageira landsins og strangar kröfur um starfsemi bankanna.