Djokovic búinn að vinna sér inn meira en 1,2 milljarða á tímabilinu

Serbinn Novak Djokovic hefur verið í rosalegu formi á þessu tímabili og sigurinn á opna bandaríska meistaramótinu í tennis á mánudaginn var þriðji sigur hans á risamóti á þessu ári. Djokovic hefur líka hagnast gríðarlega á allri þessari velgengni.

Novak Djokovic hefur nú unnið 64 leiki af 66 á þessu tímabili og er búinn að vinna sér inn 10.6 milljónir dollara á árinu 2011 eða einn milljarð og 243 milljónir íslenskra króna. Djokovic setti með þessu nýtt met í verðlaunafé á ATP-mótaröðinni.

Spánverjinn Rafael Nadal og Svisslendingurinn Roger Federer átti metið en þeir náðu því á sínum tíma að vinna sér inn 10,2 milljónir dollara, Nadal árið 2010 en Federer fyrir fjórum árum síðan.

Djokovic vann sér inn 280 milljónir íslenskra króna fyrir sigurinn á opna bandaríska mótinu í New York. Hann fékk 220 milljónir króna frá mótshöldurum og svo 60 milljónir í bónusgreiðslur.