Bannað að segja "ertu ekki að grínast" við körfuboltadómara í vetur

Nýtt tímabil er að hefjast í körfuboltanum og körfuboltadómarar fengu afhendar áherslur og starfsreglur fyrir komandi tímabil á árlegum haustfundi sínum sem fór fram um síðustu helgi. Það má búast við fleiri tæknivillum en áður í upphafi tímabilsins því dómaranefnd telur óásættanlegt að dómarar þurfi að þola

mótmæli og athugasemdir í því mæli sem verið hefur undanfarin ár af hálfu leikmanna og þjálfara.

Leikmenn eiga nú það á hættu að fá tæknivillu fyrir að láta óánægju sína í ljós þannig að allir sjái, biðja um tækni-, brottrekstrar- eða óíþróttamannslegar villur á mótherja sína, ganga eða hlaupa ákveðið að dómaranum til að mótmæla ákvörðun hans eða jafnvel að nota einfaldar upphrópanir á borð við “ertu ekki að grínast?”

Þá ætla dómarar að gera átak í að taka á svindli það er þegar leikmenn reyna að „fiska“ villur á andstæðinga sína með því að láta líta út fyrir að ólögleg snerting hafi átt sér stað eða gera meira úr snertingu en efni standa til.

Hér fyrir neðan eru áherslur fyrir komandi tímabil sem og starfsreglur fyrir körfuboltadómara sem birtist í dag inn á heimasíðu Körfuboltasambandsins.

Áherslur dómaranefndar KKÍ 2011 - 2012

Framkoma: Dómgæsla er erfitt starf. Dómaranefnd telur óásættanlegt að dómarar þurfi að þola

mótmæli og athugasemdir í því mæli sem verið hefur undanfarin ár af hálfu leikmanna og þjálfara.

Dómarar gera mistök og liðin skulu gera ráð fyrir mótlæti í undirbúningi sínum og stefnt skal að

mótmælalausum leik.

Auk þessa að fylgja reglunum um tæknivillur skulu dómarar meta hvort ekki sé rétt að dæma tæknivillur á leikmenn og þjálfara þegar þeir :

- Láta óánægju sína í ljós þannig að allir sjái, t.d. með handahreyfingum, svipbrigðum eða með

því að hlaupa eða ganga í burtu.

- Biðja um tækni-, brottrekstrar- eða óíþróttamannslegar villur á mótherja sína.

- Ganga eða hlaupa ákveðið að dómaranum til að mótmæla ákvörðun hans.

- Jafnvel nota einfaldar upphrópanir á borð við “ertu ekki að grínast?”

- Ganga of langt í magni samskipta. Það er ekki eðlilegt að dómarar þurfi stöðugt að vera í

samskiptum við sama aðilann.

Að sjálfsögðu leysir þetta ekki dómarana undan þeim skyldum að eiga góð og kurteisisleg samskipti

við þátttakendur leiksins. Ekki er ætlast til þess að þátttakendur leiksins geti ekki tekið þátt af

innlifun eða sýnt tilfinningar en bregðast skal hart við síendurteknum mótmælum og tuði.

Hagnaðarreglan: Þvert á það sem margir halda er hagnaðarreglan hornsteinn góðrar dómgæslu. Ef

brotlegur aðili hagnast ekki á broti sínu eða liðið sem brotið var gegn verður ekki fyrir óhagræði hefur

ekkert brot í raun átt sér stað.

Skrín: Gera skal ríka kröfu um að sá sem setur upp hindrun (skrín) sé kyrrstæður, með báða fætur á

gólfi og innan síns sylinders. (grein 33.7 í leikreglum)

Svindl: Að reyna að „fiska“ villur á andstæðinga sína með því að láta líta út fyrir að ólögleg snerting

hafi átt sér stað eða gera meira úr snertingu en efni standa til er svindl og ber að refsa fyrir.

Snertingar eru hluti leiksins og það er hlutverk leikmanna að reyna að standa í fæturna. Dómarar

skulu refsa þeim sem ýkja snertingar jafnvel þó á þeim hafi verið brotið.

Leikbrot: Taka skal hart á því þegar leikmenn taka aukaskref í upphafi knattraks (“spóla af stað“) sem

og að hreyfa stoðfótinn í hreyfingum nálægt körfunni. Þá skal hart tekið á því þegar leikmenn

hagnast á því að „sópa“ knettinum þ.e. að láta knöttinn stöðvast augnablik í hendi leikmanns í

knattraki þegar hann beitir hraða- eða stefnubreytingu til að komast framhjá varnarleikmanni

Leikmannaskipti: Dómarar skulu fylgja eftir að leikmannaskipti fari fram skv. leikreglum. Varamenn

skulu óska leikmannaskipta en ekki þjálfarar og varamenn skulu ekki koma inn á völlinn fyrr en

dómarar hafa gefið þeim leyfi með handabendingu. Komi varamenn inná án þess að hafa fengið til

þess leyfi skal dómari senda þá undantekningalaust útaf aftur og láta leikmannaskiptin fara rétt fram.

Samskipti utan vallar: Fulltrúar liða þurfa samþykki formanns dómaranefndar til að hafa samband við

dómara að fyrrabragði á keppnistímabilinu nema til að staðfesta ferðatilhögun eða greiðslur

reikninga.

Góður endir: Eitt mikilvægasta atriðið fyrir dómara er að tryggja ánægjulegan endi í leikjum:

- Eðlileg niðurstaða leiksins miðað við hvernig atvik þróuðust

- Fáar eða engar uppákomur varðandi ritaraborð

- Engir skrýtnir dómar – ákvarðanir oftast fyrirsjáanlegar (eðlilegar)

- Lið ganga af velli sátt - helst viljug til að þakka andstæðingum og dómurum fyrir leikinn

- Leikjum vel stjórnað á þann hátt að óhófleg framkoma leikmanna og þjálfara er ekki áberandi

- Dómarar hafi góða tilfinningu fyrir leiknum og dæmi það sem er rétt fyrir leikinn.