Sumir ennþá að gera góða veiði í Ytri Rangá

Við á Veiðivísi kíktum í gær í Ytri Rangá og tókum stöðuna á þeim mönnum sem voru þar við veiðar.  Dagurinn í gær var frekar rólegur vegna kulda en þó komu nokkrir laxar á land.  Meðal veiðimanna var ung stúlka í fylgd með föður sínum og gerði hún sér lítið fyrir og setti í 5 laxa á Klöppinni og landaði einum 10 punda.  Kom hún á eftir vanari mönnum sem urðu ekki varir á sama stað.

Annars virðist vera lúmskt mikið af laxi á sumum stöðum.  Tjarnarbreiðan gaf t.d. 17 laxa á föstudeginum og menn voru að missa mikið.  Allt var þetta tekið á flugu.  Þeir staðir sem virðast gefa vel þessa dagana eru t.d. Tjarnarbreiðan, Sandhólar (17a), Klöpp og Gaddstaðaflöt.  En það er týnast upp fiskur á eiginlega öllum stöðum þó svo að það sé ekki í miklu magni en engu að síður prýðisgóð veiði miðað við árstíma.

Og það sem vakti furðu er líka að sjá bjarta laxa sem eru nýlega gengnir í ánna.  Það er tæpar 2 vikur eftir af veiðitímanum og nokkuð víst að haldist veðrið í lagi fari áin yfir 5000 laxa á þessu tímabili.