La Russa hættir á toppnum eftir 33 ára feril

Hafnaboltagoðsögnin Tony La Russa, þjálfari meistara St. Louis Cardinals, tilkynnti í dag að hann væri hættur allri þjálfun. Þessi 67 ára gamli þjálfari hefur ákveðið að hætta á toppnum.

La Russa vann World Series í þriðja sinn á ferlinum í síðustu viku en hann var þjálfari liða í MLB-deildinni í 33 ár. La Russa vann titil með Oakland árið 1989 og hann gerði Kardinálana einnig að meisturum árið 2006.

La Russa er í þriðja sæti yfir þá þjálfara sem hafa unnið flesta leiki á ferlinum. Hann er aðeins 35 sigrum frá manninum í öðru sæti.

"Mér líður vel og tel það vera rétta ákvörðun að hætta núna," sagði La Russa á blaðamannafundi í dag.

Hann útilokar ekki að opna bókabúð í framtíðinni.