Bíll ræningjanna fundinn

Leitin að hafnaboltamanninum Wilson Ramos stendur enn yfir í Venesúela. Fjórir vopnaðir menn rændu leikmanninum heima hjá sér á miðvikudagskvöld.

Jeppinn sem Ramos var brottnuminn í fannst í gær en ekkert bólar á ræningjunum sem hafa þess utan ekki enn lagt fram kröfu um lausnargjald.

Lögreglan í Venesúela tekur málið afar alvarlega og leggur mikinn mannskap í að finna og bjarga þessum 24 ára hafnaboltamanni sem leikur með Washington Nationals.

"Við notum allan þann mannskap og öll þau úrræði sem við eigum í þetta mál," sagði yfirmaður lögreglunnar.

Á þremur hafnaboltaleikjum í Venesúela í gær var mínútuþögn fyrir leikina til stuðnings Ramos og fjölskyldu hans. Einnig mátti sjá marga með skilti í stúkunum þar sem stóð: "Frelsið Wilson Ramos."