Íslenskt hráefni eldað á amerískan máta á Grillinu

Gestakokkur Grillsins á Hótel Sögu á Food and Fun verður bandaríski kokkurinn Chris Parsons, sem rekur veitingastaðinn Catch í útjaðri Boston.

„Chris hefur mikinn áhuga á að nota íslenskt hráefni og uppistaðan í matseðlinum verður bleikja, þorskur, lamb og skyr,“ segir Sigurður Helgason, yfirkokkur á Grillinu á Hótel Sögu, um gestakokkinn Chris Parsons sem mun ráða ríkjum í eldhúsi Grillsins meðan á Food and Fun stendur.

Parsons opnaði veitingahúsið Catch í Winchester fyrir norðan Boston árið 2003 og næstu þrjú árin var staðurinn valinn besti nýi veitingastaðurinn í Boston auk þess að vera valinn besti fiskistaðurinn árið 2006. „Hann hefur líka mikinn áhuga á að fá ígulker til að matreiða, en hvort það verður að veruleika ræðst af framboðinu,“ segir Sigurður.

Parsons leggur mikla áherslu á ferskt hráefni og þá einkum fisk, sem er í samræmi við þá stefnu sem Grillið hefur sett sér. „Við einbeitum okkur að því að nota íslenskt hráefni á Grillinu,“ segir Sigurður. „Við erum það sem kallað er nýevrópskur staður, viljum ekki binda okkur við nýnorrænu stefnuna þar sem við notum hráefni eins og sítrónur og aðra suðræna ávexti.

Hins vegar leggjum við mikla áherslu á árstíðabundið íslenskt hráefni og Chris er alveg inni á því að vinna með sama hráefni og við, þannig að matseðillinn verður í okkar stíl með nýjum áherslum frá Boston og útkoman ætti að verða mjög spennandi.“