Kjóllinn hennar Kate

Enn er allt á huldu um hver hannar og hvernig brúðarkjóll Kate Middleton verður er hún gengur í það heilaga með Vilhjálmi bretaprins þann 29. apríl næstkomandi. Bæði Sarah Burton, sem hannar fyrir tískuhús Alexander McQueen, og Bruce Oldfield þykja líkleg.

Það er meðvituð ákvörðun hjá tilvonandi prinsessunni Kate Middleton að halda öllum leyndu varðandi brúðarkjól sinn en hún vill koma í veg fyrir að Vilhjálmur komist á snoðir um í hvernig stíl kjóllinn er. Margir hafa verið nefndir í sambandi við hönnun kjólsins en ljóst þykir að viðkomandi er breskur en af nógu er að taka í hönnuðaflóru þeirra.

Hönnuðirnir Sarah Burton, sem hannar fyrir tískuhús Alexander McQueen, og Bruce Oldfield þykja líkleg til að hafa hreppt hnossið. Burton hefur heillað tískuheiminn eftir að hún tók við merki Alexander McQueen þegar hann lést og er þekkt fyrir fallega kjóla úr flæðandi efni með töffaralegum brag.

Bruce Oldfield var hins vegar einn af uppáhaldsfatahönnuðum Díönu prinsessu og margir sem veðja á að Middleton hafi valið Oldfield til að heiðra minningu hennar. Oldfield hannaði til dæmis bláa kjólinn sem tilvonandi Middleton klæddist þegar parið opinberaði trúlofun sína en hönnuðurinn er fjölhæfur og til að mynda með einkennisklæðnað starfsmanna skyndibitakeðjunnar McDonalds á ferilskránni.

Einnig hafa nöfn á borð við Sophie Cranston, Vivianne Westwood, Stella McCartney og Marchesa verið nefnd í þessu samhengi. Það er hins vegar búið að opinbera að Vilhjálmur prins klæðist einkennisbúning frá breska flughernum en Middleton átti þátt í velja það fyrir hann.

Breskir tískupennar skiptast á að hrósa Kate Middleton fyrir fallegan klæðaburð og ljóst þykir að ný tískufyrirmynd er að fæðast í Bretlandi. Það er því ekki skrýtið að mikil eftirvænting ríkir fyrir kjólnum og eiga margir eftir að sitja límdir við skjáinn þegar hún gengur niður 90 metra langa kirkjugólfið í Westminster Abbey kirkjunni.

alfrun@frettabladid.is