Selá er við hundrað laxa markið

Fyrr í þessari viku höfðu ríflega níutíu laxar veiðst í Selá í Álftafirði. Að sögn Hauks Elíassonar veiðivarðar er þessi veiði í ágætu meðallagi þótt sumarveiðin hafi enn ekki náð metárinu frá í fyrra. Þá náðust yfir 150 laxar á land.

„En það er allur september eftir og margir telja það besta tímann svo það er enn von á það bætist verulega í," segir Haukur og bendir á að Selá hafi verið að jafna sig á vatnavöxtum eftir rigningar og sé í ákjósanlegu standi þessa dagana. Þannig fékk hollið sem lýkur veiðum í dag strax tvo laxa á fyrstu vakt sinni í fyrrakvöld. „Laxinn virðist dreifður nokkuð jafnt um alla á." Veitt er á tvær stangir í Selá.

Selá er að upplagi sjóbleikjuá en nú er sá góði fiskur nær algerlega horfinn úr ánni. Haukur kveðst ekki vita hvers vegna það hafi gerst. Laxinn hafi hins vegar ekki verið þar áður en hafi jafnt og þétt sótt í sig veðrið á liðnum árum.

„Það hefur gerst af sjálfu sér en ekki með sleppingum. Ég kann ekki skýringu á því nema kannski þá að um sé að ræða lax sem villst hefur úr ræktuninni í Breiðdalsá," segir Haukur.