Grænt ljós á Mandela-tónleika

„Nú setjum við bara framkvæmdina í gang og byrjum að undirbúa viðburðinn,“ segir Sigurjón Einarsson kvikmyndagerðarmaður.

Sigurjón fékk nýlega vilyrði frá ríkisstjórn Íslands um þriggja milljóna króna styrk til að undirbúa stórtónleika á vegum samtaka Nelson Mandela, 46664, hér á landi á næsta ári.

Sigurjón fer fyrir íslenskum hópi sem undirbýr viðburðinn og var að vonum ánægður með niðurstöðuna. Áður hafði Reykjavíkurborg ákveðið að styrkja tónleikaframkvæmdina um tvær milljónir króna. „Við vorum auðvitað háð því að fá bæði þennan pólitíska stuðning sem og almennan stuðning, því verkefnið er stórt, alþjóðlegt og hefur vissulega pólitíska anga. Fyrstu skrefin eru svo að stilla okkur saman við ýmsa aðila eins og ferðaþjónustuna, Hörpu og Laugardalshöll.“

Eins og Fréttablaðið hefur sagt frá voru það mannúðarsamtök Mandela, 46664, sem föluðust eftir Íslandi sem staðsetningu fyrir næstu alþjóðlega stórtónleika sína. „Það er mikill vilji innan samtakanna að Ísland verði í brennidepli á næsta ári. Dagskráin verður þannig líklega svolítið dreifð, einhver viðburður um vorið, mögulega um sumarið en aðaltónleikarnir verða í september.“

Sigurjón segist ánægður með að sjónum heimsins verði beint að stuðningi Íslands við mannúðarmál. „Ég held að við ættum ekki að týna okkur í umræðunni um hversu mikið við græðum á þessu. Fyrst og fremst er um að ræða alþjóðlegan mannúðarviðburð á risastórum skala sem verið er að setja upp á Íslandi. Það stærsta í þessu er auðvitað að geta hjálpað til við að varpa ljósi á það sem Nelson Mandela hefur barist fyrir í þau 93 ár sem hann hefur lifað.“ - bb