Svipaður fjöldi umsókna og 2011

Alls bárust umsóknir frá 2.060 félagsmönnum um veiðileyfi fyrir komandi sumar. Þetta er lítilsháttar samdráttur milli ára, en engu að síður þriðji mesti umsóknarfjöldi í sögu félagsins.

Venju samkvæmt var mikið annríki á skrifstofu félagsins síðustu daga umsóknarferlisins. Í fyrsta sinn voru umsóknareyðublöð aðeins send til félagsmanna sem náð höfðu 62 ára aldri. Aðrir gátu prentað eyðublöðin af heimasíðunni, eða sótt um rafrænt líkt og meginþorri umsækjenda kaus að gera.

Umsóknafjöldi nú er um 5% færri en fyrir sumarið 2011, en þá var 13% fjölgun í hópi umsækjenda.

Úthlutunarmenn hófu störf um helgina og því ættu félagsmenn sem sóttu um á vinsælustu veiðisvæðunum að vera vakandi fyrir símtölum frá félaginu.