Úraræninginn sam­þykkti fram­sal frá Sviss

Hæstiréttur Íslands staðfesti gæsluvarðhaldsúrskurð yfir pólskum karlmanni sem var framseldur hingað til lands frá Sviss vegna úraránsins í Michelsen. Maðurinn hefur játað brotið.

Þegar hefur einn maður verið dæmdur í fimm ára fangelsi fyrir aðild sína að ráninu. Hinir þrír komust af landi brott í október á síðasta ári eftir að þeir höfðu rænt úrum fyrir yfir 50 milljónir króna. Tveir ræningjanna voru svo handsamaðir í Sviss eftir að íslenska lögreglan lýsti eftir mönnunum í Schengen-upplýsingakerfisins. Sá fjórði er enn í Póllandi og er unnið að því að koma höndum yfir hann.

Athygli vekur að í úrskurðinum kemur fram að maðurinn hefði samþykkt framsal til Íslands. Framsalið fór fram þann 13. mars síðastliðinn. Var hann svo úrskurðaður í gæsluvarðhald við komuna til landsins vegna rannsóknarhagsmuna.

Enn er unnið að því að fá þriðja manninn framseldan frá Sviss þar sem hann er í haldi lögreglu þar í landi vegna sakamálarannsóknar og ekki verði unnt að yfirheyra hann fyrr en hann verði framseldur eftir u.þ.b. mánuð.

Varðhaldið rennur út 18. apríl.