Ellefu laxar á fyrri vaktinni í Norðurá

Alls veiddust 11 laxar á fyrri vaktinni í Norðurá í dag. Það þarf að fara aftur til ársins 1999 til að finna betri byrjun.

"Ég var búinn að spá því að þetta yrði besta opnunin á þessari öld og þetta lítur bara mjög vel út, það er ekki hægt að segja annað," sagði Bjarni Júlíusson, formaður Stangaveiðifélags Reykjavíkur, þegar Veiðivísir sló á þráðinn til hans nú í hádeginu. "Það eru laxar mjög víða í ánni og það veit á gott."

Árið 1999 var opnunin frábær en þá veiddust 15 laxar fyrri vaktinni og 28 á þeirri seinni eða 43 laxar alls.

Bjarni segir að fiskarnir sem hafi veiðst hafi allir verið vel haldnir og fallegir. Þeir stærstu ríflega 80 sentímetrar eða á bilinu 11 til 13 pund. Hann segist vongóður á framhaldið í dag.