Fjórir stórlaxar á land í Bíldsfelli

Svo virðist sem veiðin í Bíldsfellinu sé að hrökkva í gang. Bræður sem veiddu þarna um á sunnudaginn sendu Stangaveiðifélagi Reykjavíkur nokkrar línur um gang mála. Í bréfinu segir meðal annars:

"Þegar við hófum veiðar höfðu 32 laxar verið skráðir í bókina þannig að þetta fer rólega af stað í Soginu. Við höfum aldrei veitt þarna áður þannig að við renndum dálítið blint í Sogið, þegar við byrjuðum að veiða. Minnugir þess að Sogið getur verið varhugavert þá vorum við í flotvestunum allan tímann sem við veiddum, og sama gerðu aðrir veiðimenn. Enda fór það svo að einn veiðimaður fór á flot og tók nokkur sundtök."

Samkvæmt bréfinu virðist sem lax hafi verið að ganga í Soginu um helgina:

"Fyrir hádegið fengum við einn í Sakkarhólma og aðrir veiðimenn fengu einn við Efra Horn. Þá kom einn 5 punda sjóbirtingur úr Tóftum. Eftir hádegið fengum við ekki fleiri fiska á okkar stöng en einn og sami veiðimaðurinn fékk fjóra tveggja ára laxa, sem komu úr Efri Garði, Neðri Garði, Tóftum og Melhorni. Allt fiskar á bilinu 85-90 sm og allir fengust þeir á svartan Toby. Það var engu líkar en að fiskur væri að ganga sem eru afar góðar fréttir. Kannski er veiðin eitthvað að taka við sér. "

Undir bréfið. sem birtist á vef SVFR, skrifar "sáttur veiðimaður".

trausti@frettabladid.is