Fín veiði í Korpu og laxinn vel dreifður um ána

Alls eru 100 laxar komnir á land í Korpu. Veiðin hefur verið mjög góð það sem af er sumri og er fiskurinn vel dreifður um ána samkvæmt upplýsingum frá veiðivörðum.

"Gaman er frá því að segja að lax er búinn að veiðast á flest öllum merktum veiðistöðum árinnar en það má þakka þeim breytingum sem gerðar voru fyrir ofan fossinn í vor en þær auðvelda laxinum að ganga hann," segir í tilkynningu frá veiðivörðum.

"Mikið er ennþá af laxi í Blikstaðakrónni og eru laxar og sjóbirtingar að ganga inn á hverju flóði. Maðkurinn er skæðastur en flugan hefur verið gefa vel þeim sem hana reyna og þá helst smáflugur og micro-keilutúpur. Til þess að ná góðum árangri í Korpu verður að fara varlega og munið eitt, það sem styggir laxinn mest er skugginn af sjálfum þér," segir í tilkynningunni.

Í fyrra veiddust 210 laxar í Korpu samkvæmt vef Landssambands veiðifélaga. Frá árinu 1974 til 2008 veiddust að meðaltali 296 laxar í ánni. Mest veiddist sumarið 1988 en þá komu 709 laxar á land. Minnsta veiðin var árið 1980 þegar 110 laxar veiddust.

trausti@frettabladid.is