Dikta frumsýnir glæsilegt myndband á Vísi

Leikararnir Alexander Briem og Gunnar Hansson fara á kostum í glænýju myndbandi hljómsveitarinnar Diktu við lagið What Are You Waiting For? Myndbandið er frumsýnt hér á Vísi í dag.

Alexander og Gunnar leika kappakstursbílstjórana Benzino og Dynamo Joe og fjallar myndbandið um baráttu þeirra á brautinni. Benzino er ósigraður til margra ára en Dynamo Joe kemur eins og þruma úr heiðskíru lofti og sigrar allt sem hægt er að sigra. Þá leitar Benzino hefnda og neyðir hann í lokakappakstur.

Myndbandið er gert af þeim Helga Jóhannssyni leikstjóra, Atla Viðari Þorsteinssyni framleiðanda og Hrafni Garðarssyni tökumanni. Saman hafa þeir gert tónlistarmyndbönd sem hafa vakið athygli bæði hér heima og erlendis, til dæmis Drama með Tilbury og Supertime með Berndsen, eitt vinsælasta íslenska tónlistarmyndband síðustu ára.

Lagið What Are You Waiting For? hefur notið gríðarlegra vinsælda síðustu mánuði. Það er af fjórðu breiðskífu Diktu, Trust Me, sem kom út á Íslandi í fyrra. Platan kemur út víða í Evrópu á næstunni og mun þetta glæsilega myndband án efa styðja vel við útgáfuna.