Samstarfi Ásdísar og Stefáns lokið

Stefán Jóhannsson er ekki lengur þjálfari spjótkastarans Ásdísar Hjálmsdóttur en þetta kom fram í fréttatilkynningu frá frjálsíþróttadeild Ármanns í morgun.

Þar kemur fram að Ásdís, í samráði við forráðamenn dieldarinnar og Stefán sjálfan, hafa ákveðið að binda endi á þjálfarasamstarfið sem hefur nú staðið yfir í ellefu ár.

Ásdís varð í ellefta sæti í spjótkasti kvenna á Ólympíuleikunum í London þar sem hún setti einnig nýtt og glæsilegt Íslandsmet. Er hún nú í sextánda sæti heimslistans í sinni grein.

„Ég er ákaflega þakklát Stefáni fyrir allt sem hann hefur gert fyrir mig. Hann hefur fylgt mér eftir vakinn og sofinn og átt mjög stóran þátt í að koma mér á þann stað sem ég er á í dag. Nú er þessu tímabili lokið og komið að því að stíga næstu skref á mínum ferli," er haft eftir Ásdísi í tilkynningunni.

Ásdís mun ekki veita fjölmiðlum viðtöl vegna þessa máls.