Veitt út mánuðinn í Ytri-Rangá

Lax-á hefur ákveðið að lengja laxveiðitímann í Ytri-Rangá um tíu daga. Veitt verður til 30. október en þess ber að geta að fyrsti vetrardagur er 27. október.

„Þetta er fínt tækifæri fyrir þá sem vilja segja bless; fyrir þá sem vilja kveðja laxveiðisumarið með einum lokatúr," segir Stefán Sigurðsson, sölustjóri hjá Lax-á.

Þó veiðin hafi vissulega dvínað töluvert undanfarnar vikur er einn að reitast upp fiskur í ánni. Síðustu tvo daga hafa veiðst um tíu laxar.

„Veiðin er auðvitað erfið þegar það er frost úti, það gefur augaleið," segir Stefán. „Á þessum árstíma líta menn nú líka á þetta sem góða útiveru og vilji menn hreinsa hugann aðeins er fátt betra en að standa á árbakka með veiðistöng. Það er líka ágætt að láta sér verða aðeins kalt í vöðlunum og fá sér pulsu í sjoppunni á Hellu."

Verðið per stöng er á bilinu 10.500 til 15.500 krónur eins og sjá má á agn.is.

trausti@frettabladid.is