Stórmerkileg tíðindi frá Írlandi

Á vef SVFR koma fram stórmerkilegar upplýsingar um þróun verðs á veiðileyfum á einu þekktasta svæði Írlands. Þar er brugðist við breytingum á kaupmætti veiðimanna með afgerandi hætti.

Frétt SVFR er eftirfarandi: "Það hafa víðar orðið efnahagsþrengingar en á Íslandi, og eru frændur okkar Írar meðal þeirra sem illa hafa orðið úti. Þar hefur orðið verðhrun á laxveiðileyfum á flestum laxveiðisvæðum.

Gott dæmi um þetta er að finna á einu þekktasta veiðisvæði Írlands, Blackwater Lodge, við hina heimsþekktu Blackwater. Í nýlegri yfirlýsingu frá eigendum veiðisvæðanna segir:

"Vegna efnahagsþrenginga í heiminum eru veiðileyfi til stangaveiðimanna að lækka á heimsvísu. Þetta er gert til að halda í núverandi viðskiptavini svo og til að tryggja nýliðun í greininni.Vegna þessa munu veiðileyfi í Blackwater lækka um rúmlega 50% á milli áranna 2012 og 2013"

Þetta er athyglivert, en stór fjöldi Evrópubúa sækir ána heim ár hver. Þetta er enn ein vísbending þess að verð veiðileyfa hérlendis er að fara í þveröfuga átt miðað við það sem gerist annarsstaðar í heiminum."

svavar@frettabladid.is