Dikta á mikilli siglingu

Dikta er nýskriðin heim til Íslands eftir vel heppnaða tónleikaferð til Þýskalands og Sviss og stefnir á frekari útrás á komandi ári. Í kvöld heldur sveitin órafmagnaða tónleika í Vídalínskirkju en tónleikarnir eru orðnir árlegur viðburður hjá drengjunum og eins og undanfarin ár fá þeir með sér aðra tónlistarmenn úr Garðabænum. Söngvarinn Haukur Heiðar mætti í viðtal hjá Yngva Eysteins á FM957 í morgun. Hægt er að hlusta á viðtalið hér fyrir ofan og á útvarpvef Vísis. Þar ræddi Haukur um tónleikana í kvöld, jólaplötu föður síns, næstu plötu Dikta og margt fleira. Pétur Ben og Ómar Guðjónsson koma fram ásamt Diktu í kvöld. Pétur Ben sendi nýverið frá sér sína aðra breiðskífu, God's Lonely Man, sem hlotið hefur afbragðs dóma og Ómar var að enda við að gefa út sína fyrstu rokkplötu, Útí geim, en hann var að ljúka tvöföldum túr um landið með Jónasi Sigurðssyni. Tónleikarnir hefjast klukkan 20 í kvöld og miðaverð er 2500 krónur. Hægt er að nálgast miða á midi.is. Hér fyrir neðan er síðan hægt að sjá myndbandið við lagið What Are You Waiting For? sem var frumsýnt hér á Vísi í haust.