Ekkert brúðkaup hjá Brangelinu

Það er enn bið í að ofurparið Brad Pitt og Angelina Jolie gangi upp að altarinu. Parið, sem er talið eiga von á sínu sjöunda barni, hefur áður gefið það út að þau munu ekki ganga í það heilaga fyrr en jafn réttur allra hafi verið tryggður og hjónabönd samkynhneigðra verði leyfð.

Pitt tjáði sig þó um það í viðtali við The Hollywood Reporter nýlega að það væri erfitt að halda þetta út. Hann sagði pressuna frá börnunum þeirra verða sífellt meiri, auk þess sem þau hefðu sjálf mikla löngun til að bindast hvort öðru á þennan hátt en þau eru búin að vera saman í á sjöunda ár.

Í viðtali á SAG verðlaunahátíðinni síðastliðinn sunnudag sagðist Pitt sjá eftir því að hafa tjáð sig um þessa löngun hans til að ganga að eiga barnsmóður sína.