Íslensku fatalínurnar brjálæðislegar og svolítið á mis

Tískuhátíðin RFF fór fram í þriðja sinn helgina sem leið. Umsagnir erlendra blaðamanna hafa nú ratað á Netið og þó sumir geri góðlátlegt grín að landi og þjóð hrifust þeir einnig af vinnu íslensku hönnuðanna.

Meðal þeirra erlendu blaðamanna er heimsóttu landið í tilefni RFF voru blaðamenn frá þýska, ítalska og breska Vogue, danska Eurowoman og aðstandendur vefsíðnanna Fashionista.com, Fashionetc.com og Stylecaster.com.

Jo Piazza hjá Fashionista segir eftirtektarvert hversu gaman hönnuðirnir og aðstandendur RFF höfðu af vinnu sinni. „Þau hafa frelsi til að einbeita sér að því listræna og forvitnilega og eru fyrir vikið stórskemmtileg,“ ritar hún.

Ástæðuna fyrir töfrandi hönnun íslensku hönnuðanna segir Piazza vera náin tengsl þeirra við huldufólk. Hún líkir einnig hönnun Kron by Kron Kron við fatnað persónanna úr Game Of Thrones.

Godfrey Deeny hjá Fashion Wire Daily skrifar í grein sinni að skortur á hátískuverslunum á landinu skili sér í flottari fatastíl meðal landsmanna. „Þó fatalínur hönnuðanna séu oft brjálæðislegar og svolítið á mis, þá taka Íslendingar tískuhátíðinni sinni mjög alvarlega,“ skrifar Deeny.

Hann segir Munda, Hörpu Einarsdóttur, Kormák & Skjöld og Rebekku Jónsdóttur hafa borið af hvað varðar gæði og ferskleika en er minna hrifinn af hönnun Millu Snorrasonar og Birnu.

Vogue.it hefur einnig birt myndir frá tískusýningunum sem og vefsíðan Fashionnow.com.

sara@frettabladid.is