Tólf tíma tónleikamaraþon á KEX

„Þetta er til stuðnings útvarpsstöðinni KEXP í Seattle," segir Baldvin Esra Einarsson, viðburðastjóri Kex Hostels, sem skipuleggur tólf tíma útitónleika á gistiheimilinu KEX laugardaginn 14. júlí fyrir fyrrnefnda útvarpsstöð en hún reiðir sig á framlög hlustenda í rekstri sínum.

Útvarpsstöðin KEXP hefur heimsótt landann síðustu þrjár Iceland Airwaves-tónlistarhátíðir og endurtekur leikinn í ár. „Þeir verða með beinar útsendingar frá tónleikunum okkar í ár og svo taka þeir upp fullt af myndböndum. Þeir gerðu það sama í fyrra og það vakti mikla lukku. Myndbandið með GusGus, sem var opnunaratriðið, hefur núna fengið um milljón áhorf," segir Baldvin en tónleikar GusGus voru klukkan eitt að hádegi sem þýðir að stuðtónarnir hafi hljómað í eyrum Seattle-búa klukkan sex að morgni.

„Vinsældir Of Monsters and Men í Bandaríkjunum má rekja til myndbands sem KEXP tók upp á stofutónleikum árið 2010," bætir hann við en útvarpsstöðin er í virtri stöðu hvað varðar kynningu á nýrri tónlist.

„Það verða vinsælar hljómsveitir sem og skrítnari bönd," nefnir hann og telur upp Ghostigital, Sóleyju, Hjálma, Sudden Weather Change, Tilbury, Snorra Helgason og HumanWoman. Röð bandanna verður ekki tilkynnt fyrr en samdægurs og enn eiga tónlistarmenn eftir að bætast við. Tónleikamaraþonið stendur frá tólf að hádegi til miðnættis og verður aðgangur ókeypis en frjáls framlög þegin.

- hþt