Breytt rokk úr Breiðholtinu frá fyrrum björtustu voninni

Önnur breiðskífa Sudden Weather Change kemur út á miðvikudaginn og er margt spennandi í vændum hjá sveitinni sem ferðast vestur um haf með haustinu.

„Jú, við höfum breyst,” segir Logi Höskuldsson, hljómsveitarmeðlimur Sudden Weather Change, um aðra breiðskífu þeirra, Sculpture, sem kemur út 25. júlí, en þrjú ár eru frá útgáfu fyrri plötu hljómsveitarinnar. „Við stefnum núna meira að því sem okkur langar virkilega að gera en við kláruðum allir nám úr Listaháskólanum í myndlist og það hjálpaði okkur við að ná fókus í verkefninu.”

Upptökur fóru fram í Gróðurhúsinu og á óhefðbundnum stöðum í samstarfi við Ben Frost og Þorbjörn G. Kolbrúnarson. „Gróðurhúsið er rosa flott stúdíó í Breiðholti og mjög vel við hæfi þar sem við byrjuðum hljómsveitina í því hverfi en við vorum allir í Fjölbrautaskólanum í Breiðholti.”

Heimildarmynd um sveitina í leikstjórn Loga verður frumsýnd í Bíói Paradís 9. ágúst. „Þarna vorum við stjörnurnar,” segir hann en hún sýnir hversdagslegt líf drengjanna árið 2010 þegar þeir voru bjartasta von Íslensku tónlistarverðlaunanna.

Margt er á döfinni hjá drengjunum og spila þeir á laugardaginn á LungA á Seyðisfirði og halda hlustunarpartí í Netagerðinni 26. júlí. Einnig halda þeir vestur um haf í október. „Við erum að fara að spila á hátíð í Los Angeles,” segir hann spenntur og bætir við að möguleg tónleikaferð sé í smíðum.

Plötunni má hlaða niður á tónlistarveitunni Gogoyoko fyrir endanlega útgáfu hljómplötunnar.

hallfridur@frettabladid.is