Tónelskir læknar stíga á svið í nýrri tónleikaröð

„Við köllum þessa uppákomu Tónelskir læknar taka lagið,“ segir hjartalæknirinn Helgi Júlíus Óskarsson.

Vaskur hópur lækna tekur sér frí frá krefjandi læknastörfum sínum og stígur á svið á Kaffi Rósenberg á mánudagskvöld kl. 20.30. Þar verða haldnir fyrstu ókeypis tónleikarnir í nýrri tónleikaröð sem vonast er til að verði haldin nokkrum sinnum á ári, einungis með læknum í fararbroddi.

„Við komum eiginlega ekki fleirum að. Það voru menn sem komust ekki að núna sem geta fyllt annað kvöld,“ segir Helgi Júlíus. Hann er einn þeirra sem stíga á svið og syngja frumsamin lög. Sjö önnur atriði eru á efnisskránni. Oktettinn Einn tvöfaldur, sem er átta manna karlakór, mætir á svæðið, Gleðisveit Guðlaugar spilar djasskennda læknatónlist, doktor Haukur Heiðar Hauksson úr Diktu spilar eigin lög og læknirinn Jón Steinar Jónsson kemur með tríóið sitt Triceps, sem er einnig skipað Helga Júlíusi og Þórði Þorkelssyni. Sá síðastnefndi hefur jafnframt upp raust sína einn á sviðinu, rétt eins og hjartalæknirinn Ragnar Danielssen. Hann var í Frummönnum með þeim Valgeiri Guðjónssyni og Jakobi Frímanni en sú sveit breytti síðar um nafn og varð að Stuðmönnum. Loks mætir barnalæknirinn Michael Clausen til leiks með hljómsveit með í för. Ef svo óheppilega vill til að einhver tónleikagesta fái aðsvif eða annað slíkt á tónleikunum er ljóst að hann gæti ekki valið betri stað til þess.

Helgi Júlíus gaf á síðasta ári út reggíplötuna Kominn heim og hafa tvö lög af henni með söngvaranum Valdimari Guðmundssyni náð miklum vinsældum, sérstaklega Stöndum saman. Hann er með nýja plötu tilbúna sem kemur út eftir áramót. Lögin verða í blússtíl og margir frægir söngvarar verða í gestahlutverkum, sem Helgi vill ekki nefna á nafn að svo stöddu.

freyr@frettabladid.is