Syngur um Eydísi á eitíslegri plötu

„Er ég að syngja til konu sem heitir Eydís eða er söngvarinn bara svona linmæltur og saknar níunda áratugarins? Það er spurningin sem hlustendur verða að velta fyrir sér,“ segir Felix Bergsson um nýtt lag sitt, Eydís, sem hljómað hefur ótt og títt á öldum ljósvakans síðustu daga. Lagið, sem Felix segir að verði meðal annars fáanlegt á Tónlist.is á næstu dögum, er það fyrsta af væntanlegri plötu sem söngvarinn vinnur nú að ásamt Jóni Ólafssyni.

Felix segist strax hafa hafist handa við gerð nýrrar plötu eftir að vinnu við síðustu breiðskífu, Þögul nóttin, þar sem Felix söng ný lög við ljóð Páls Ólafssonar, var lokið. „Við erum að vinna með eitís-sánd en reynum auðvitað að gera góða og nútímalega popptónlist,“ útskýrir Felix, sem sjálfur kom fram á sjónarsviðið um miðjan níunda áratuginn sem söngvari Greifanna. Hann semur alla texta á nýju plötunni með hjálp Braga Valdimars Baggalúts, en áætlað er að platan komi út um mitt næsta ár. Lagahöfundar eru téður Jón Ólafsson, Eberg, Davíð Berndsen, Dr. Gunni og Karl Olgeirsson.

Sá síðastnefndi er einmitt höfundur lagsins Eydís. „Þetta er helvíti fínn smellur frá Kalla Olgeirs,“ segir Felix. „Sérstaklega finnst mér húmorinn í lagasmíðinni skemmtilegur. Ef fólk þekkir hljómsveitir á borð við Johnny Hates Jazz og fleiri eitís-slagarabönd þá fer ekki milli mála að hljómagangurinn og andi lagsins er algjörlega í þá áttina. - kg