Tólf ára í bílaeltingaleik

Ók 80 kílómetra á öðru hundraðinu uns lögregla náði að hefta för hennar.

Eftir mikið rifrildi og ósætti við föður sinn greip 12 ára stúlka frá S-Karólínu í Bandaríkjunum til þess ráðs að stela pallbíl í nágrenni heimilis síns og aka honum 80 kílómetra vegalengd. Meiningin var að aka til heimilis ættmenna stúlkunnar, en það tókst ekki alveg.

Lögreglan veitti henni fljótlega eftirtekt og taldi að þar færi ökumaður undir áhrifum áfengis, en þeim brá hressilega í brún þegar hið rétta kom í ljós. Við stýrið var 12 ára barn sem klakklaust tókst að komast þessa vegalengd án þess að valda slysi og það stundum á 70 mílna hraða eða 112 km/klst.

Á endanum náðu lögreglumenn á fjölmörgum bílum að umkringja bíl stúlkunnar og stöðva för hennar. Stúlkan hefur ekki enn verið kærð fyrir athæfið, enda ef til vill erfitt að kæra barn fyrir slíkt.