Fréttir af bardaga Gunnars fljótar að leka út

„Enn og aftur er Gunnar að fara eitt skref upp því Mike Pyle er þrettándi á heimslistanum og mjög sterkur andstæðingur," segir Haraldur Dean Nelson, umboðsmaður og faðir bardagakappans Gunnars Nelson.

Haraldur staðfesti í samtali við Vísi í morgun að munnlegt samkomulag hefði náðst um bardaga Gunnars gegn Mike Pyle á UFC 160-hátíðinni í Las Vegas þann 25. maí. Haraldur segir um mikinn heiður að ræða fyrir son sinn. Um stórt kvöld sé að ræða í Las Vegas þar sem þungavigtarbardagi UFC sé aðalbardagi kvöldsins.

Samkomulagið lak strax útHaraldur segist hafa veitt því athygli að fréttir um bardagann hafi birst strax eftir að munnlegt samkomulag náðist í nótt.

„Andstæðingurinn (innsk: Mike Pyle) virðist hafa samþykkt að berjast og því hefur þetta lekið út. Við vitum svo sem ekkert hvaða háttinn þeir (forsvarsmenn UFC) hafa á því. Ég sá bara að þetta birtist á mmajunkie.com um leið og ég var búinn að samþykkja þetta og ekki sagði ég þeim það," segir Haraldur kíminn.

„UFC twittaði svo fréttinni þeirra sem segir auðvitað helling," bætir Haraldur við.

Hvíldin að engu orðin

Gunnar vann sigur á Jorge Santiago í UFC-veltivigtabardaga í London fyrir tveimur vikum. Sigurinn fleytti honum upp í 20. sæti heimslistans í veltivigt. Að honum loknum sagði hann að fyrir lægi að hvíla sig vel.

„Það liggur fyrir hvíldin verður ekki enda er ekki það langt í þetta. Gunni hefði kosið smá pásu en þetta er bara rosalega dagskrá, stór staður og mjög athyglisverður andstæðingur," segir Haraldur um Mike Pyle sem einnig hefur komið við sögu á hvíta tjaldinu með kempum á borð við Jean-Claude Van Damme og Dolph Lundgren.

Pyle er 37 ára gamall Bandaríkjamaður sem hefur unnið sex af síðustu sjö UFC-bardögum sínum. Að sögn mmajunkie hefur hann verið á mikilli siglingu undanfarið.

„Gunnar hefur verið að berjast upp fyrir sig og það er það sem maður vill. Hann hefur verið að berjast við miklu stærri nöfn og Mike Pyle er mjög stórt nafn í heimi bardagaíþrótta. John Kavanagh, þjálfari Gunnars, er til dæmis mikill aðdáandi hans," segir Haraldur.

„Hann er mjög sterkur, bæði standandi og í gólfinu. John Hathaway, sem er skærasta stjarna Breta í veltivigtinni, hefur tapað einum bardaga á ferlinum og það var gegn Mike Pyle."

Launin ekkert fréttaefni

Vangaveltur hafa verið uppi um hversu vel Gunnar þéni fyrir að vera á samningi hjá UFC. Haraldur segir samning Gunnars við UFC liggja fyrir, fjölda bardaga og annað í þeim efnum.

„Við gerum ekki samning um einstaka bardaga eins og við gerðum áður en við sömdum við UFC. Það gerðum við áður því Gunni vildi aldrei semja við neina af minni keppnunum," segir Haraldur.

Hann segir laun Gunnars ekki leyndarmál af þeirra hálfu en þeir geti þó ekki tjáð sig um þau. Það sé hluti af samningnum við UFC. Sambandið birti þó nokkuð reglulega upplýsingar um laun bardagakappanna þótt það hafi ekki verið gert enn í tilfelli Gunnars.

„UFC gefur út laun og við höfum ekkert við það að athuga. Þetta eru ekki slíkar upphæðir að þetta séu einhverjar stórfréttir. Við höfum ekkert að fela en getum ekkert sagt."