Jón Trausti nýr formaður Bílgreinasambandsins

Tekur við af Sverri Viðari Haukssyni. Jón Trausti er forstjóri Öskju.

Jón Trausti Ólafsson, framkvæmdastjóri Bílaumboðsins Öskju, var kjörinn formaður Bílgreinasambandsins á aðalfundi þess í dag. Jón Trausti hefur starfað í bílgreininni frá árinu 1998 og komið að sölu-, markaðs- þjónustu- og gæðamálum. Jón Trausti var áður markaðsstjóri Heklu en frá árinu 2010 hefur hann gegnt starfi framkvæmdastjóra Öskju, auk þess að vera stjórnarmaður í Bílgreinasambandinu frá árinu 2011. Jón Trausti útskrifaðist með MBA gráðu frá Háskólanum í Reykjavík vorið 2011 og sem viðskiptafræðingur frá Viðskiptaháskólanum á Bifröst 2006.

„Bílgreinasambandið er mikilvægur þáttur í uppbyggingu á öflugu þjónustu- og gæðastarfi bílgreinarinnar á Íslandi. Í dag eru yfir 100 fyrirtæki á landinu innan vébanda þess sem starfa á breiðum grundvelli bílgreinarinnar. Er þar um að ræða bílaverkstæði, bílasölur, bílaumboð, smurstöðvar, réttingaverkstæði og varahlutasala. Bílgreinasambandið hefur lagt mikilvæg lóð á vogarskálarnar undanfarin ár í uppbygginu á faglegri starfsemi bílgreinarinnar. Má þar nefna uppbyggingu gæðakerfa m.a. Gæðavottun BGS, stuðning við CABAS tjónamatskerfið, rekstur Bíló kerfisins, fræðslumál og fleira," segir Jón Trausti.

Jón Trausti segir að hátt í 50 fyrirtæki séu með gæðavottun BGS og hefur trú á að þeim muni fjölga enn frekar á næstunni. ,,Framundan er áframhald á því uppbyggingarstarfi og ég hlakka til að takast á við þau verkefni með félagsmönnum Bílgreinasambandsins, með það að markmiði að auka enn á gæði og vegsemd bílgreinarinnar hér á landi," Segir Jón Trausti ennfremur. Hann tekur við formennsku af Sverri Viðar Haukssyni, sem leitt hefur Bílgreinasambandið frá árinu 2010.