Heill tugur mætti til makrílveislu

Heill tugur manna var saman komin á Ingólfstorgi í gær. Tilefnið var að sjálfsögðu hin mikla makrílveisla Heimssýnar, hreyfingu sjálfstæðissinna í Evrópumálum, en þau hafa verið óþrjótandi í baráttunni við hið andstyggilega Evrópusamband.

ESB hefur verið á móti því að Íslendingar þurrki upp makrílstofna í Norðurhöfum og vilja forráðamenn sambandsins að Íslendingar semji um málið við önnur ríki í Evrópu. Þessu eru félagsmenn Heimsýnar náttúrulega ósammála og vilja þeir miklu frekar að Íslendingar sitji einir að veislunni.

Til þess að undirstrika mikilvægi þessarar einörðu afstöðu sinnar buðu þeir Íslendingum að smakka þetta hnossgæti sem makríllinn er á Ingólfstorgi í gær. Viðtökurnar voru hreint út sagt frábærar. Talið er að allt að 15 manns hafi verið á svæðinu þegar mest lét, þar af voru tveir Færeyingar og einn Grænlendingur. 

Gríðarlegt fjölmenni var þegar mest lét og greinilegt að Íslendingar ætla ekki að láta evrópska blýantanagara ráðskast með sig. Samhugurinn er mikill og þrautseigjan gríðarleg hjá Hreyfingu sjálfstæðissinna í Evrópumálum.

Til þess að tryggja fjölmenna mætingu á svæðið voru hinir feykigóðu Harmonikkubræður fengnir til þess að flytja nokkur frábær harmonikkulög á meðan á samkomunni stóð. Einn viðstaddra sem Harmageddon ræddi við sagði að stemmningin hafi verið ólýsanlega góð. 

Í fyrstu leit út fyrir að mætingin yrði ekkert til að hrópa húrra fyrir en um leið og Harmonikkubræður byrjuðu að spila sínu ljúfu og þjóðlegu tóna rættist vel úr. Talið er að allt að fimmtán manns hafi verið saman komin á torginu þegar stuðið stóð sem hæst. Það er því nokkuð ljóst að Heimsýnarfólkið vann mikið þrekvirki með veislunni í gær.