Blikar skipta um markverði

Markverðirnir Sonný Lára Þráinsdóttir og Halla Margrét Hinriksdóttir eru gengnar í raðir bikarmeistara Breiðabliks í knattspyrnu.

Sonný Lára kemur í Kópavoginn úr röðum Fjölnis þar sem hún hefur leikið nær allan sinn feril. Hún er 27 ára gömul og á að baki rúmlega tíu ára feril í meistaraflokki Grafarvogsliðsins.

Halla Margrét varði mark Aftureldingar í fimm leikjum síðastliðið sumar í Pepsi-deildinni. Hún á að baki leiki með 19 ára landsliði Íslands.

Sonný og Halla munu fylla í skarð Birnu Kristjánsdóttur, sem sleit krossbönd síðastliðið sumar, og Mistar Elíasdóttur sem ætlar að róa á ný mið.