Engin persónuleg gögn tengd heimasíðu Læknavaktarinnar

„Það eru engin persónuleg gögn á heimasíðunni okkar. Þar er hægt að skoða sögu

Læknavaktarinnar og tölulegar upplýsingar um aðsókn og þess háttar,“ segir

Gunnar Örn Jóhannsson, framkvæmdastjóri Læknavaktarinnar.

Á hakkarasíðunni Zone-H.org kemur fram að brotist hafi verið inn á hátt í þúsund íslenskar heimasíður á árinu. Þar kemur meðal annars fram að brotist hafi verið inn á vef Læknavaktarinnar 5. september síðastliðinn og 29. september í fyrra.

Gunnar Örn segist ekki hafa orðið var við árásirnar á sínum tíma. Hann segir að persónuleg gögn, meðal annars heilsufarslegar upplýsingar, komi hvergi nálægt heimasíðu Læknavaktarinnar.

„Vefurinn er hýstur úti í bæ og innbrot á hann kemur hvergi nálægt sjúkragögnum okkar. Það er alveg kristaltært,“ segir Gunnar Örn.