Syngja bæði á hebresku og úkraínsku

„Það þýðir ekkert að standa á sviðinu og kunna ekki þessa texta. Þetta verður möppulaust „show“,“ segir Friðrik Ómar. Söngvararnir í sýningunni Saga Eurovison. Friðrik Ómar, Regína Ósk og Selma Björnsdóttir, hafa verið í stífri tungumála- og framburðarkennslu að undanförnu. Þau þurfa að syngja á fjölmörgum snúnum erlendum tungumálum í sýningunni, þar á meðal hebresku, úkraínsku, frönsku, slóvensku, ítölsku og þýsku. „Þetta gengur ótrúlega vel. Það einhvern veginn liggur ótrúlega vel fyrir okkur að syngja á fullt af tungumálum. Við tökum þessa sýningu eins og leiksýningu. Við erum búin að æfa í mánuð og eigum sex vikur eftir. Þetta er ekkert sveitaball,“ segir Friðrik Ómar og hlær. Ellefu tónleikar eru fyrirhugaðir víða um land þar sem saga Eurovision-keppninnar verður rakin frá árinu 1956 til dagsins í dag. Fyrstu tónleikarnir verða í Hofi á Akureyri 19. apríl en þeir stærstu verða í Eldborg í Hörpu 4. maí. „Við förum þrjá hringi í kringum landið. Ég fékk frænda minn, sem er með meirapróf, til að keyra okkur. Fyrst ætluðum við að keyra sjálf en þetta er svo þétt prógram að við verðum að hvílast eitthvað,“ segir Friðrik Ómar, sem vonast til að sýningin fari til útlanda í framtíðinni. „Þetta „show“ er „international“. Við erum ekki að tjalda til einnar nætur.“