Engar ofurhetjur, bara fólk eins og þú og ég

Elí Freysson hefur vakið athygli fyrir bækur sínar sem fjalla um Þögla stríðið og nú er þriðja bókin í seríunni, Kallið, komin út. Elí er þó engan veginn búinn að afgreiða þann heim sem hann skapar í sögunum og er að ljúka við þá fimmtu.

„Þessi heimur varð bara til í höfðinu á mér,“ segir Elí Freysson, sem á dögunum sendi frá sér þriðju bókina í bókaflokknum um Þögla stríðið, spurður hver sé fyrirmyndin að þeim heimi sem hann skapar í bókunum. „Ég vildi segja ákveðna sögu, með ákveðnum stíl og ákveðnum karakterum og þessi heimur varð til í kringum það,“ útskýrir Elí.

Bókin heitir Kallið og þar er í forgrunni ný söguhetja, Katja að nafni. Fyrri bækurnar eru Meistari hinna blindu og Ógnarmáni, en Elí segir enga af sögupersónum þeirra bóka vera með í þeirri nýju. „Bækurnar eiga þennan heim sameiginlegan en ég skrifa þær með það í huga að nýir lesendur geti gengið að hverri bók fyrir sig vandræðalaust,“ segir Elí. „Í þessari bók er ég að þróa sagnaheiminn betur og koma meira upp um það sem að baki liggur.“ Hvers vegna heitir þetta Þögla stríðið? „Vegna þess að það er ekki raunverulegt stríð í gangi,“ segir Elí. „Það eru dulin öfl í skuggunum sem brugga sín launráð og svo fólk sem berst gegn þessum öflum. Áður höfðu þessar fylkingar átt í heljarinnar styrjöldum en nú eru rósturnar meira í laumi og þess vegna er þetta kallað Þögla stríðið. Ég held þó alltaf fókusnum á karakterunum og því sem þeir ganga í gegnum, heimurinn er meira bara svið fyrir það sem kemur fyrir þá.“ Elí segir persónur sínar vera venjulegt fólk eins og þig og mig, engar goðsagnahetjur. „Þær eru bara manneskjur sem glíma við alls konar erfiðleika eins og allir.“

Bækurnar eru, eins og ljóst ætti að vera að framansögðu, fantasíubókmenntir, hefur sú bókmenntagrein lengi verið í uppáhaldi hjá þér? „Já, ég hef lesið mikið af þeim. Ég hef ansi þröngan bókmenntasmekk og fantasíurnar eru það sem ég hef leitað mest í.“ Elí segist þó aldrei hafa lesið Game of Thrones, sem sumir halda að sé fyrirmynd hans, áhugi hans á fantasíum hafi hafist með lestri á Lord of the Rings, haldið áfram við að lesa alls kyns fantasíur eftir mismunandi höfunda og núorðið sé Brandon Sanderson í mestu uppáhaldi.

Þótt Kallið sé nýkomin út er Elí þó kominn mun lengra með sögurnar úr Þögla stríðinu, er að klára fimmtu bókina og á von á að þær verði tíu til tólf þegar upp er staðið. „En ég er kominn með hugmynd að nýrri seríu sem ég mun taka til við þegar þessari er lokið. Ég er ekkert að fara að hætta að skrifa á næstunni.“