Sannleikurinn: Vinsælustu folunum oftast skilað

Það er ekki bara vinsælum jólabókum skilað. Konur eru líka duglegar við að losa sig við karlmenn og skila þeim. Ritstjóri Séð og Heyrt, sem við munum ekki hvað heitir því Birtingur er alltaf að reka fólk, segir að vinsælustu folarnir séu einnig þeir sem oftast var skilað.

„Það er ekkert óeðlilegt að þessum mönnum hafi oftast verið skilað á árinu sem var að líða. Þegar menn eru vinsælir er oftast gott aðgengi að þeim. Konur geta einfaldlega fengið þá lánaða þangað til þær eru búnar með þá en af því að það er svo auðvelt að fá þá lánaða vill engin eiga þá.“

Sölva Tryggvasyni, Ágústi Bent, Charlie Sheen, Villa naglbít og Sverri Bergmann var oftast skilað en hjartaknúsararnir eru vanalega ekki lengi að finna sér nýjar kærustur til að hætta með sér.



Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu sem hún mun hætta með fljótlega.