Oddviti Íbúahreyfingarinnar: "Á betri stað en hjá Samfylkingu“

Sigrún H. Pálsdóttir er nýr oddviti M-lista íbúahreyfingarinnar í sveitarstjórnarkosningum í Mosfellsbæ. Jón Jósef Bjarnason,  sá sem leiddi listann síðast, skipar annað sætið. Sigrún H. Pálsdóttir hefur gegnt trúnaðarstörfum fyrir Samfylkinguna lengi, verið vefstjóri flokksins og situr í umhverfisnefnd Mosfellsbæjar fyrir Samfylkinguna.

Sigrún segir vistaskiptin ánægjuleg fyrir sig og telur sig vera á betri stað en hjá Samfylkingu. „Ég er á mjög góðum stað núna. Það hefur öllum verið ljóst að ég hef náin tengsl við Íbúahreyfinguna, þetta eru vinir mínir og síðan á ég einnig systur í hreyfingunni,“ segir Sigrún.

„Ég fékk þetta góða boð frá Íbúahreyfingunni, þau hafa lengi boðið mér að vera með þeim á lista. Svo buðu þau mér bara mikið betur en Samfylkingin.“

Sigrún segir stöðuna innan Samfylkingarinnar allt aðra eftir oddvitaskipti þar. Jónas Sigurðsson, bæjarfulltrúi flokksins hættir sem oddviti og Anna Sigríður Guðnadóttir tók við keflinu. „Nú er uppi allt önnur staða eftir að Jónas fer. Samfylkingin bauð mér 14. sætið sem mér fannst ekki endurspegla þá vinnu sem ég var búinn að leggja leggja á mig fyrir Samfylkinguna á kjörtímabilinu.“

Íbúahreyfingin náði þeim árangri í síðustu kosningum að verða annað stærsta stjórnmálaaflið í Mosfellsbæ með 15,2% atkvæða og einn bæjarfulltrúa kjörinn.

Opnir og lýðræðislegir stjórnarhættir eru mikið hagsmunamál fyrir íbúa að mati Íbúahreyfingarinnar því þeir stuðla að málefnalegri meðferð mála og réttlátari og hagkvæmari ráðstöfun fjár. Ráðandi öfl fá þannig aðhald og verða síður ofurseld þrýstingi sérhagsmunaaðila.

listi íbúahreyfingarinnar:

1. sæti. Sigrún H. Pálsdóttir, verkefnisstjóri og leiðsögumaður

2. sæti. Jón Jósef Bjarnason, ráðgjafi og hluthafi hjá IT ráðgjöf ehf.

3. sæti. Hildur Margrétardóttir, myndlistarkona og kennari

4. sæti. Jón Jóhannsson, glerlistamaður og garðyrkjubóndi

5. sæti. Birta Jóhannesdóttir, leiðsögumaður og klínískur tannsmiður

6. sæti. Þórður Björn Sigurðsson, mannfræðingur

7. sæti. Úrsúla Jünemann, kennari og leiðsögumaður

8. sæti. Jóhannes B. Eðvarðsson, húsasmíðameistari

9. sæti. Kristín I. Pálsdóttir, bókmenntafræðingur

10. sæti. Emil Pétursson, húsasmíðameistari

11. sæti. Alma Ósk Guðjónsdóttir, leikskólakennari

12. sæti. Páll Kristjánsdóttir, hnífasmiður

13. sæti. Sæunn Þorsteinsdóttir, myndlistarkona og verkstæðisstýra

14. sæti. Valdís Steinarrsdóttir, skyndihjálparkennari

15. sæti. Sigrún Guðmundsdóttir, umhverfis- og auðlindafræðingur

16. sæti. Soffía Alice Sigurðardóttir, leiðsögumaður og listakona

17. sæti. Ellen Ruth Ingimundardóttir, dýralæknir

18. sæti. Ingimar Sveinsson, fv. bóndi og kennari í hestafræðum

Allar fréttir af sveitarstjórnarkosningunum 2014 má nálgast á Kosningavef Vísis, visir.is/kosningar