Oddvitaáskorun - Stolt af árangri í lækkun skulda

Vísir stendur fyrir Oddvitaáskoruninni 2014 þar sem skorað er á oddvita allra flokka í kjördæmum um land allt að taka þátt.

Ásta Stefánsdóttir leiðir lista Sjálfstæðismanna í Sveitarfélaginu Árborg.

Ég er búsett á Selfoss, en alin upp í sveitinni austan Stokkseyrar og bjó á Stokkseyri  ásamt eiginmanni og tveimur dætrum til ársins 2007 en þá fluttum við á Selfoss. Ég er stúdent frá Fjölbrautaskóla Suðurlands, útskrifaðist þaðan af málabraut fyrir margt löngu, en lagði síðan leið mína í Háskóla Íslands þar sem ég lærði lögfræði.

Að námi loknu vann ég sem fulltrúi Sýslumannsins á Selfossi og um tíma sem settur dómari við Héraðsdóm Suðurlands. Ég hef starfað fyrir Sveitarfélagið Árborg frá árinu 2006, fyrst sem bæjarritari og frá 2010 sem framkvæmdastjóri sveitarfélagsins og þekki því vel til starfsemi þess og þeirrar þjónustu sem það veitir.

Frístundum eyði ég með fjölskyldunni, heima við eða í sveitinni, en við höfum gaman af ferðalögum, innan lands sem utan. Besta slökunin sem ég veit fæst með því að lesa góða glæpasögu eða róa nokkur áratog, hef þó ekki prófað að blanda þessu saman. Ég get saumað eina og eina flík, en kann sama sem ekkert að prjóna.

YFIRHEYRSLAN

Hver er fallegasti staðurinn á Íslandi?

Erfitt að gera upp á milli, en Herðubreið er a.m.k. fegurst fjalla.

Hundar eða kettir?

Við höfum átt bæði ketti og hunda, núna eru á heimilinu tveir hundar sem eldri dóttirin á og þrír gullfiskar frá þeirri yngri, þannig að kettir eru beðnir að halda sig fjarri.

Hver er stærsta stundin í lífinu?

Kannski hljómar það klisjukennt, en það að fá dætur mínar í fangið í fyrsta sinn kemur efst í hugann.

Hver er uppáhaldsmaturinn þinn?

Það er eitthvað ómótstæðilegt við hreindýrasteik af grillinu, en mesta stemmingin við matargerð er klárlega þegar stórfjölskyldan kemur saman og grillar heilt lamb á teini.

Hvernig bíl ekur þú?

Kia Rio er bíllinn minn.

Besta minningin?

Brúðkaupsdagurinn var afar skemmtilegur, svo á ég margar góðar bernskuminningar.

Hefur þú verið tekin af lögreglunni?

Nei, hef alltaf komist undan.

Hverju sérðu mest eftir?

Iðrast þess stundum að hafa ekki prufað að fara í nám erlendis.

Draumaferðalagið?

Kastalaskoðunarferð með fjölskyldunni, en það er eitthvað við kastala sem heillar dætur mínar sérstaklega.

Hefur þú migið í saltan sjó?

Nei, ég á árabát sem ég nota talsvert, en ég ræ alltaf í land ef mér verður mál :)

Hvað er það skrýtnasta sem þú hefur gert?

Það súrrealískasta er tvímælalaust atvik sem átti sér stað 29. maí 2008, en þá var planað að sveitarfélagið tæki á móti hópi gesta sem voru á ráðstefnu á Selfossi, rétt áður en samkoman átti að byrja reið jarðskjálfti um 6,5 á Richter yfir svæðið.

Við sem sáum um þetta héldum okkar striki og tókum á móti fólkinu fyrir utan Tryggvaskála en ekki innandyra, enda var allt þakið glerbrotum þar. Þarna stóðum við úti á hlaði, reyndar í blíðskaparveðri, og reiddum fram snittur á meðan bílar með blá ljós þustu hjá. Gestirnir voru mjög glaðir því þeim var gert að yfirgefa hótelið og þetta virkaði kannski sem nokkurskonar áfallahjálp fyrir þá.

Hefur þú viðurkennt mistök?

Já, það hef ég gert.

Hverju ertu stoltust af?

Um þessar mundir er ég afar stolt af góðum árangri sem náðst hefur í rekstri sveitarfélagsins og við lækkun skulda þess.

Fram að sveitarstjórnarkosningunum 31. maí munum við birta kynningu á oddvitum víðsvegar um landið. Allir oddvitar geta tekið þátt í Oddvitaáskorun Vísis. Nánari upplýsingar er hægt að nálgast á netfanginu samuel@365.is.