Hættu við að lýsa yfir fullkomnu vantrausti á Sveinbjörgu

Hrund Þórsdóttir skrifar 29. maí 2014 13:42

Sveinbjörg hefur heldur betur verið í eldlínunni undanfarna viku.

Stjórn ungra Framsóknarmanna birti í gærkvöldi harðorða ályktun þar sem lýst er yfir fullkomnu vantrausti á Sveinbjörgu Birnu Sveinbjarnardóttur, oddvita flokksins í Reykjavík. Yfirlýsingin var fjarlægð skömmu síðar og engir hlutaðeigandi hafa látið ná í sig í morgun til að gefa skýringar á málinu.

Ályktunin var birt á heimasíðu Ungra Framsóknarmanna og á Facebook-síðu þeirra í gærkvöldi. Þar er vísað í 65. grein stjórnarskrárinnar þar sem segir að allir skuli vera jafnir fyrir lögum og njóta mannréttinda.

Í ályktuninni segir orðrétt: Stjórn Ungra Framsóknarmanna SUF, lýsir yfir fullkomnu vantrausti á oddvita lista Framsóknar og flugvallarvina, Sveinbjörgu Birnu Sveinbjarnardóttur, vegna framgöngu hennar í málefnum sem varða lóðaúthlutanir fyrir trúfélög. Framganga hennar gangi í berhögg við grunnstefnu Framsóknarflokksins um virðingu fyrir einstaklingum og að ekki skuli mismuna eftir kynþætti, kynferði, tungu, trú, þjóðerni, kynhneigð, búsetu eða stjórnmálaskoðunum.

Ályktunin er því býsna harðorð en skömmu eftir að hún birtist á netinu var hún fjarlægð. Fréttastofa reyndi ítrekað að ná í stjórnarmeðlimi Sambands ungra Framsóknarmanna í morgun til að fá skýringar á því af hverju yfirlýsingin var fjarlægð, en án árangurs.

Ekki náðist heldur í Sveinbjörgu í morgun.Guðfinna Jóhanna Guðmundsdóttir, sem skipar annað sæti á lista Framsóknar í Reykjavík, skildi eftir athugasemd á ályktuninni á Facebooksíðu Ungra Framsóknarmanna í gærkvöldi og skrifaði aðeins eitt orð: krúttlegt.

Guðrún Bryndís Karlsdóttir, sem fyrr á árinu skipaði annað sæti á lista flokksins í borginni, hefur birt pistil á vefsíðu Kvennablaðsins þar sem fram kemur að lengi hafi staðið til að fulltrúar Framsóknarflokksins beittu sér gegn byggingu mosku í Reykjavík.

Segir hún að brýnt hafi verið fyrir henni að verkefni borgarfulltrúa flokksins ætti að vera að koma í veg fyrir að moska risi í Reykjavík og má því ætla að ummæli Sveinbjargar, oddvita flokksins, um afturköllun lóðar til múslima, séu engin hending.

Tengdar fréttir

Fordómarnir og tvískinnungurinn

Framsóknarflokkurinn kastaði neti fyrir atkvæði á fremur ógeðfelldum miðum fordóma og útlendingahaturs þegar Sveinbjörg Birna Sveinbjörnsdóttir, oddviti flokksins í Reykjavík, sagði í samtali við Vísi að hún vildi afturkalla lóðir sem Félagi múslima á Íslandi og rússnesku rétttrúnaðarkirkjunni hefur verið úthlutað fyrir helgidóma.

28. maí 2014 07:00

„Maður stýrir ekki borg með því að mismuna fólki eftir trúarskoðunum“

Oddvitar allra flokka í Reykjavík sem rætt var við fordæma ummæli oddvita Framsóknarflokksins um byggingu mosku.

24. maí 2014 07:15

Sveinbjörg Birna kæmist í borgarstjórn

Niðurstöður nýrrar skoðanakönnunar sýna að Sveinbjörg Birna Sveinbjörnsdóttir, kæmist í borgarstjórn. Þetta er fyrsta skoðanakönnunin sem birtist síðan hún lét umdeild ummæli um mosku í Reykjavík falla.

28. maí 2014 17:16

Sóley: „Framsókn á ekkert erindi í borgarstjórn“

Sóley Tómasdóttir segir Framsókn stunda pólitík sem byggi á misrétti og ali á fordómum. Það eigi ekkert erindi í borgarstjórn Reykjavíkur.

29. maí 2014 12:43

Sveinbjörg svarar fyrir sig: „Stjúpmóðir barna minna er múslimi“

Sveinbjörg Birna Sveinbjörnsdóttir, oddviti lista Framsóknarmanna og flugvallarvina, segir að Íslendingar þurfi að læra af reynslu nágrannalandanna.

25. maí 2014 16:00

Guðrún Bryndís um Framsóknarflokkinn: Moskan átti alltaf að vera kosningamál

Guðrún Bryndís Karlsdóttir segir frá tíma sínum í Framsóknarflokknum í ítarlegri grein.

28. maí 2014 23:40

Oddviti Framsóknar vill afturkalla lóð til múslima

"Ég hef búið í um eitt ár í Sádí Arabíu og byggi þessa skoðun mína ekki á fordómum, heldur reynslu," segir Sveinbjörg Birna Sveinbjörnsdóttir, oddviti lista Framsóknarflokksins og flugvallarvina. Hún telur að á meðan hér á landi sé þjóðkirkja eigi ekki að úthluta lóðar til byggingu mosku eða sambærilegra húsa annarra trúfélaga.

23. maí 2014 15:08

Enn þegir Sigmundur Davíð

Vaxandi óþol er gagnvart því að forysta Framsóknarflokksins taki ekki afgerandi um afstöðu til mjög svo umdeildrar afstöðu oddvita flokksins í Reykjavík sem túlkuð hefur verið sem andúð í garð innflytjenda.

28. maí 2014 13:51