Oddvitaáskorunin - Tryggja áframhaldandi góðan rekstur Grindavíkurbæjar

Vísir stendur fyrir Oddvitaáskoruninni 2014 þar sem skorað er á oddvita allra flokka í kjördæmum um land allt að taka þátt.

Bryndís Gunnlaugsdóttir leiðir lista Framsóknarflokksins í Grindavík í sveitarstjórnarkosningunum í vor.

„Ég hef alltaf verið kölluð Bryndís en örfáir nánir vinir mínir kalla mig stundum Bibbu. Ég er 33 ára og er lögfræðingur frá HR og starfa í fyrirtækjaskrá RSK. Áður en ég fór í HR lauk ég stúdentsprófi frá FS og þar var mitt helsta afrek að ná hreinni 10 í stærðfræði 303.

Helstu áhugamál mín eru íþróttir og þá helst körfubolti og síðan tónlist, spil og matargerð. Fullkomið kvöld væri því að borða góðan mat áður en farið er á körfuboltaleik og enda kvöldið í góðum félagsskap yfir spili með góða tónlist í gangi.

Ég er stolt af því að vera Grindvíkingur og eins og flestir Grindvíkingar þá tel ég bæjarfélagið vera nafla alheimsins.“

YFIRHEYRSLAN

Hver er fallegasti staðurinn á Íslandi?

Bláa lónið.

Hundar eða kettir?

Kettir.

Hver er stærsta stundin í lífinu?

Útskrifast með BA og Meistaragráðu í lögfræði og vera kosin forseti bæjarstjórnar í Grindavík 29 ára gömul.

Hver er uppáhaldsmaturinn þinn?

Grillað folaldakjöt með góðri sósu og sætum kartöflum.

Hvernig bíl ekur þú?

Yaris.

Besta minningin?

Fjölskyldustundirnar í Helgadal.

Hefur þú verið tekinn af lögreglunni?

Já, fyrir of hraðan akstur og að stoppa ekki á stöðvunarskyldu en orðið mörg ár síðan.

Hverju sérðu mest eftir?

Hafa ekki farið í skiptinám til Suður-Afríku þegar ég fékk tækifæri til en fór ekki því lítill tími var til undirbúnings.

Draumaferðalagið?

Ferðast um Afríku.

Hefur þú migið í saltan sjó?

Nei en ég er fær í flestan sjó.

Hvað er það skrýtnasta sem þú hefur gert?

Smakkað djúpsteiktan heila.

Hefur þú viðurkennt mistök?

Já.

Hverju ertu stoltust af?

Hafa átt þátt í því að snúa við erfiðri fjárhagsstöðu Grindavíkur í að vera eitt af best fjárhagslega stöddu sveitarfélögum landsins.

Fram að sveitarstjórnarkosningunum 31. maí munum við birta kynningu á oddvitum víðsvegar um landið. Allir oddvitar geta tekið þátt í Oddvitaáskorun Vísis. Nánari upplýsingar er hægt að nálgast á netfanginu samuel@365.is.