„Þessi ákæra er röng og ég er saklaus“

Hreiðar Már Sigurðsson, fyrrverandi forstjóri Kaupþings, neitaði sök við þingfestingu máls á hendur honum, Sigurði Einarssyni og Magnúsi Guðmundssyni í Héraðsdómi Reykjavíkur í dag. Þeir eru sakaðir um umboðssvik.

Hreiðar var sá eini hinna þriggja sem var viðstaddur þingfestinguna í dag. Sigurður og Magnús munu mæta fyrir dóminn 4. júlí og taka afstöðu til ákærunnar.

„Ég starfaði í fimmtán ár hjá Kaupþingi, þar af tíu ár sem forstjóri og aðstoðarforstjóri,“ sagði Hreiðar Már í dómssal í dag. Hann neitaði sök í málinu.

„Ég tók aldrei ákvörðun gegn hagsmunum bankans. Þessi ákæra er röng og ég er saklaus.“

Þremenningarnir eru ákærðir í þriðja sinn af sérstökum saksóknara en ákæran er vegna tugmilljarða lánveitingar vegna viðskipta með skuldatryggingar fyrir hrun.

Þeim er gert að hafa misnotað stöðu sína sem stjórnendur bankans í lánveitingum til nokkurra eignarhaldsfélaga sem voru í eigu vildarviðskiptavina bankans. Lánin voru svo notuð til að kaupa skuldatryggingar á Kaupþings banka, eða svokölluð Credit Linked Notes, með það fyrir augum að lækka skuldatryggingarálag bankans í aðdraganda bankahrunsins árið 2008. Í ákærunni kemur fram að lánin hafi numið tugum milljarða króna.