Hús­leit hjá Öl­gerðinni

Þetta kemur fram í tilkynningu Beru til Kauphallar.

Eftirlitið grunar Beru um brot á 11. grein samkeppnislaga sem leggur bann við hvers konar misnotkun eins eða fleiri fyrirtækja á markaðsráðandi stöðu.

„Húsleitin er framkvæmd með heimild Héraðsdóms Reykjavíkur og er liður í rannsókn sem á þessu stigi tekur til tímabilsins frá og með árinu 2020 til dagsins í dag. Félagið mun veita upplýsingar um framgang málsins eftir því sem tilefni verður til,“ segir í tilkynningunni.

Samkeppniseftirlitið framkvæmdi nýlega rannsókn á mörkuðum sem Ölgerðin starfar á. Þar kom fram að eftirlitið teldi sterkar vísbendingar um að Ölgerðin væri í markaðsráðandi stöðu í sölu á léttvíni og sterku áfengi til veitingastaða og annarra stórnotenda. 

Innherji fjallaði ítarlega um málið og kom fram að Ölgerðin væri tvisvar til þrisvar sinnum stærra en helstu keppinautar á markaði. Sömuleiðis að við rannsókn á kaupum Ölgerðarinnar á Gæðabakstri og Kjarnavörum hefðu margir keppinautar lýst áhyggjum af því að aukin vörubreidd gæti gert félaginu kleift að styrkja enn frekar stöðu sína með því að tvinna saman sölu matvæla og drykkjarvara.

Andri Guðmundsson, stjórnarformaður Beru, sagði í stuttu samtali við Vísi í morgun að hann væri að afla sér frekari upplýsinga og gæti ekki veitt viðtal að svo stöddu. Samkvæmt upplýsingum fréttastofu eru forsvarsmenn Ölgerðarinnar og Beru á fundi með almannatengli og ólíklegt er að þeir veiti viðtal fyrir hádegi. Þá hefur Vísir reynt að ná sambandi við forstjóra Samkeppniseftirlitsins og sérfræðing þess í kynningar- og miðlunarmálum, án árangurs.

Ólafur Þór Hauksson héraðssaksóknari segir í samtali við Vísi að embættið hafi aðstoðað Samkeppniseftirlitið við húsleitina. Hann geti ekki tjáð sig frekar um málið sem sé á forræði Samkeppniseftirlitsins.