Murray í frjálsu falli

Bretinn Andy Murray, sem vann Wimbledon-mótið í tennis fyrir ári síðan, féll í dag niður í tíunda sæti heimslistans.

Murray féll úr leik í fjórðungsúrslitum mótsins í ár er hann tapaði fyrir Grigor Dimitrov frá Búlgaríu. Hann hefur ekki verið svo neðarlega á listanum í sex ár.

Meiðsli hafa sett strik í reikninginn hjá Murray en hann missti af síðustu þremur mánuðum síðasta tímabils vegna þeirra. Hann hefur hins vegar ekki unnið neinn sem er á meðal tíu efstu á listanum síðan hann fagnaði sigri á Wimbledon í fyrra.

Novak Djokovic, sem fagnaði sigri á Wimbledon um helgina, komst upp í efsta sæti listans á kostnað Rafael Nadal. Djokovic hafði betur gegn Roger Federer í úrslitaleiknum en Nadal féll óvænt úr leik í 16-manna úrslitum.

Federer komst aftur upp í þriðja sæti listans og upp fyrir landa sinn, Stanislas Wawrinka. Djokovic og Nadal eru þó með talsverða forystu á næstu menn á listanum.

Efstu tíu:

1. Novak Djokovic, Serbíu

2. Rafael Nadal, Spáni

3. Roger Federer, Sviss

4. Stanislas Wawrinka, Sviss

5. Tomas Berdych, Tékklandi

6. Milos Raonic, Kanada

7. David Ferrer, Spáni

8. Juan Martin Del Potro, Argentínu

9. Grigor Dimitrov, Búlgaríu

10. Andy Murray, Bretlandi