Blanda komin yfir 500 laxa

Á meðan árnar á Vesturlandi eru rólegar í gang fer lítið fyrir rólegheitum í Blöndu en áin er núna komin yfir 500 laxa og verður með þessu áframhaldi fyrst yfir 1000 laxa.

Það er, eins og maðurinn sagði, bullandi gangur í Blöndu og veiðin hreint út sagt frábær í ánni.  Mest veiðist á svæði I en þar komu til að mynda upp 44 laxar í gær og meira og minna allt fallegur tveggja ára lax þó minni lax slæðist með.  Göngur hafa verið með besta móti en sá tími sem er að fara í gang er þó besti tíminn í ánni og það er því ekkert ósennilegt að það sé hægt að gera ráð fyrir 50 löxum eða meira á dag næstu daga þá verður áin komin yfir 1000 laxa áður en mánuðurinn er hálfnaður.  Laxinn er snöggur upp ánna og þegar hefur orðið vart við nokkuð af laxi á efri svæðunum en þau hafa verið minna stunduð síðustu daga.