Sólin lét loks sjá sig á Gaddstaðaflötum á Hellu þar sem Landsmót hestamanna fer nú fram. Það hefur eflaust hefur glatt margan manninn eftir hráslagalega, blauta viku. Um 15 stiga hiti er á Hellu, heiðskýrt og logn en þó er von á rigningu síðar í dag.
Veðurguðirnir hafa ekki verið hliðhollir gestum og knöpum í vikunni sem er að líða en fresta þurfti mótinu síðastliðinn miðvikudag vegna hættu sem skapaðist í kjölfar mikillar bleytu og hálku á völlunum.
Landsmótið er þó nokkuð vel sótt en um tíu þúsund manns voru á svæðinu í gærkvöld þegar mótið náði hápunkti. Mótinu lýkur klukkan 15 í dag.
