Áfrýjar Aurum málinu og krefst ómerkingar

Ríkissaksóknari hefur áfrýjað dómi Héraðsdóms Reykjavíkur í Aurum málinu svokallaða, þar sem þeir Jón Ásgeir Jóhannesson, Lárus Welding, Magnús Arnar Arngrímsson og Bjarni Jóhannesson voru sýknaðir af ákærum um umboðssvik og hlutdeild í þeim,  til Hæstaréttar. RÚV greindi fyrst frá málinu. Í áfrýjuninni krefst Ríkissaksóknari þess að héraðsdómurinn verði ómerktur.

Dómurinn var kveðinn upp þann 5. júní síðastliðinn þar sem mennirnir voru allir sýknaðir og ríkinu gert að greiða 45 milljónir í lögmannskostnað.

Samkvæmt heimildum RÚV telur Ríkissaksóknari að einn dómaranna, Sverrir Ólafsson, hafi verið vanhæfur til að dæma í málinu þar sem hann er bróðir Ólafs Ólafssonar sem var í fyrra sakfelldur í héraðsdómi fyrir hlutdeild í umboðssvikum í Al Thani málinu. Málið á hendur Ólafi var sótt af sérstökum saksóknara líkt og Aurum málið. RÚV hefur þar að auki heimildir fyrir því að fleiri ástæður liggi að baki því að Ríkissaksóknari telji Sverri vanhæfan.

Með ómerkingarkröfu fer ríkissaksóknari fram á að málið verði sent aftur til héraðsdóms og réttað í því upp á nýtt.

Í málinu voru fjórmenningarnir ákærðir fyrir umboðssvik vegna sex milljarða króna láns sem Glitnir veitti félaginu FS38 ehf. sem var í eigu Pálma Haraldssonar, vegna kaupa á félaginu Aurum Holdings Ltd.

Gestur Jónsson verjandi Jóns Ásgeirs segist vera hissa á þessari ákvörun Ríkissaksóknara. „Ég held að það séu ekki skilyrði samkvæmt lögum til að líta svo á að Sverrir Ólafsson hafi verið vanhæfur sem dómari í málinu. Þar að auki trúi ég því ekki að sérstökum saksóknara hafi ekki verið kunnugt um þau tengsl sem nú eru talin eiga að valda því að Sverrir hafi ekki verið hæfur,“ segir Gestur.