Frábær veiði í flest öllum hálendisvötnunum

Það virðist vera nokkurn veginn sama í hvaða vatni er veitt á hálendinu, þar sem einhverja veiði er að finna, alls staðar virðist vera meira af silung og vænni en oft áður.

Eitthvað hefur verið rætt um meinta minni veiði í Veiðivötnum en í fyrra og hafa einhverjir veiðimenn verið að kvarta undan þessu á samfélagsmiðlunum þrátt fyrir að veiðin sé í öllum tölum betri en í fyrra og fleiri stórir fiskar komið þar upp heldur en í fyrra.  Vötnin á Landmannaafrétt hafa sömuleiðis gefið fína veiði þó að Ljóti Pollur og Frostastaðavatn séu með mestu veiðina.  Arnarvatnsheiðin er búin að vera frábær sem og vötnin á Skagaheiði en þar hafa margir hópar verið með ævintýralega góða veiði og silungurinn er áberandi stærri en síðustu ár.  Þetta virðist vera gangurinn í vatnaveiðinni þessa dagana alveg öfugt við laxveiðina sem virðist ekki ennþá vera komin í gang, alla vega ekki í fullann gang.  Það er svo komið að veiðimenn sem hafa verið að núlla í einhverjum ánum hafa gjarnan stoppað í vötnum nálægt ánum til að ná í eitthvað í soðið og dæmi eru jafnvel um að menn hafi jafnvel sleppt úr vöktum á rólegum svæðum í laxveiði til að fara bara í silung.