Aníta í 12. til 17. sæti í Mongólíu

Aníta Margrét Aradóttir er í 12. til 17. sæti á þriðja keppnisdegi Mongol Derby keppninnar. Hún er nú í búðum tíu ásamt fimm öðrum keppendum. Ellefu keppendur eru þó komnir í búðir ellefu. -

Í tilkynningu á Facebook síðu hennar segir að fimm knapar hafi hætt keppni. Þá munu aðstæður á mongólsku sléttunum hafa verið erfiðar í dag eftir miklar rigningar í gær. Víða var þó nokkuð svað og bleyta sem hægði á keppendum og gerði þeim erfiðara fyrir.

Mögulegt er að fylgjast með gangi Anítu og reiðleið hennar hér.

Um er að ræða þúsund kílómetra langa kappreið á lítið sem ekkert tömdum mongólskum villihestum.