Liverpool valtaði yfir Dortmund á Anfield | Sjáðu mörkin

Liverpool vann stórsigur á Borussia Dortmund á Anfield Road í síðasta æfingaleik sínum áður en enska úrvalsdeildin hefst.

Liverpool náði forystunni á 10. mínútu þegar Daniel Sturridge skoraði eftir sendingu frá Philippe Coutinho.

Aðeins þremur mínútum síðar kom Dejan Lovren Liverpool í 2-0 með skalla eftir hornspyrnu Steven Gerrard. Staðan var 2-0 í hálfleik.

Það voru aðeins liðnar fjórar mínútur af seinni hálfleik þegar Coutinho skoraði þriðja mark Liverpool eftir sendingu frá Raheem Sterling. Og á 61. mínútu skoraði Jordan Henderson fjórða og síðasta mark Liverpool eftir sendingu frá Sturridge.

Lokatölur 4-0, Liverpool í vil, sem er svo sannarlega gott veganesti fyrir átökin í ensku úrvalsdeildinni sem hefst um næstu helgi.

Liverpool mætir Southampton í sínum fyrsta leik á sunnudaginn eftir viku.

Dortmund mætir Bayern München í leik um þýska Ofurbikarinn á miðvikudaginn.

Hér ofan má sjá mörkin úr leiknum.